Төслийн дунд хугацааны үр дүнг танилцуулах семинар эхэллээ

Азийн хөгжлийн банкны Техникийн туслалцааны дэмжлэгтэйгээр тус газарт 2018 оны 02 дугаар сараас “Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох” төсөл хэрэгжиж эхэлсэн билээ. Тэгвэл тус төслийн дунд хугацааны үр дүнг танилцуулах, хэлэлцэх семинар өнөөдөр буюу 2019.05.30-ны өдөр Улаанбаатар хотноо эхэллээ. Семинарын нээлтэд Улсын бүртгэлийн ерөнхий газрын дарга Б.Баасандорж, дэд дарга Д.Дэлгэрсайхан, Тамгын газрын дарга Г.Цолмон, АХБ-ны Монгол дахь Захирал бөгөөд Суурин төлөөлөгч Ёланда Фернандез Ломмен, АХБ-ны Монгол дахь Дэд захирал бөгөөд Суурин төлөөлөгчийн орлогч, Төслийн удирдагч Деклан Магий болон тус газрын бусад удирдлагууд оролцлоо. 

Төслийн дунд хугацааны үр дүнгийн семинарт Улсын бүртгэлийн ерөнхий газар, 21 аймгийн бүртгэлийн хэлстэс, Азийн хөгжлийн банк болон төрийн бусад байгууллагын төлөөлөл нийт 150 гаруй хүмүүс оролцож байна. Уг семинарт тус хэлтсийн иргэний бүртгэлийн тасгийн дарга, улсын ахлах бүртгэгч Я.Арвижих, Есөнбулаг сумын улсын бүртгэгч Ч.Угтахбаяр, Халиун сумын улсын бүртгэгч С.Чинзориг, Бичиг хэргийн ажилтан Б.Тогтохбаяр нар оролцлоо.
“Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох” төсөл нь улсын бүртгэлийн систем, мэдээллийн санг хөгжүүлэх, тоног төхөөрөмж, дэд бүтцийг сайжруулах, төрийн албан хаагчдын чадавхийг бэхжүүлэх замаар Засгийн газраас дэвшүүлсэн “Нэг иргэн, нэг бүртгэл” хөтөлбөрийг хэрэгжүүлэхэд туслалцаа үзүүлэх зорилготой.